राज्याचे मुख्यमंत्री देवेंद्र फडणवीस आणि दोन्ही उपमुख्यमंत्री एकनाथ शिंदे, सुनेत्रा पवार यांच्यात आज महत्वपूर्ण बैठक होणार असल्याची माहिती आहे. विधान परिषदेत तीन पदवीधर आणि दोन शिक्षक मतदारसंघाच्या जागा आहेत. त्या निवडणुकी संदर्भात ही बैठक होणार आहे. भाजप प्रमाणेच शिवसेना आणि राष्ट्रवादी काँग्रेसकडून सुद्धा या जागांवर दावा सांगितला जातोय. काल समन्वय समितीची बैठक झाली. त्यात प्राथमिक चर्चा झाली. आज मुख्यमंत्री आणि दोन उपमुख्यमंत्र्यांमध्ये होणारी बैठक महत्वाची आहे.
मुख्य तिढा पुण्याच्या जागेचा
छत्रपती संभाजीनगर, पुणे, नागपूरमध्ये पदवीधर तर अमरावती आणि पुण्यात शिक्षक मतदारसंघाच्या जागा आहेत. विधान परिषदेच्या कुठल्या जागा कोणाला मिळणार, कोण कुठून लढवणार त्याचा निर्णय आजच्या बैठकीत होऊ शकतो. विधान परिषदेच्या जागांच्या संदर्भात निर्णय अपेक्षित आहे.मुख्य तिढा पुण्याच्या जागेचा असू शकतो.
पुण्यात पदवीधर आणि शिक्षक मतदारसंघाच्या दोन जागा आहेत. पुण्यातील शिक्षक मतदारसंघाच्या जागेवर भाजप, राष्ट्रवादी आणि शिवसेना शिंदे गट हे तिन्ही पक्ष या जागेवर दावा सांगतायत. पुणे शिक्षक मतदार संघानंतर शिवसेना शिंदे गटाकडून पदवीधर मतदार संघाचीही मागणी करण्यात आली आहे. पुणे पदवीधर मतदार संघातून शिवसेना शिंदे गटाचे नेते भाऊसाहेब आंधळकर इच्छुक आहेत. एकनाथ शिंदे आणि श्रीकांत शिंदे यांच्याकडे उमेदवारीची मागणी करण्यात आली आहे.
त्यामुळे पक्षाने मला डावलू नये
भाऊसाहेब आंधळकरांनी यापूर्वी शिवसेनेकडून बार्शी विधानसभेची निवडणूक लढवली होती. त्यानंतर आता पुणे पदवीधर मतदारसंघाची उमेदवारी मिळवण्यासाठी इच्छुक आहेत. मी पुणे पदवीधर मधून मोठी बांधणी केलीय. त्यामुळे पक्षाने मला डावलू नये अशीही मागणी भाऊसाहेब आंधळकर यांनी केलीय.
भाजप आणि शिवसेना शिंदे गट आमने-सामने येण्याची शक्यता
भाजपचे मंत्री चंद्रकांत पाटील यांच्याकडून देखील या दोन्ही मतदारसंघावर दावा करण्यात आला आहे. पुणे पदवीधर आणि शिक्षक मतदार संघाच्या जागा परंपरागत भाजपाच्या आहेत, दोन्ही जागांवर आमचा दावा आहे, असं चंद्रकांत पाटील यांनी म्हटलं आहे. त्यामुळे पुन्हा एकदा पुणे पदवीधर आणि शिक्षक मतदार सांघाच्या निवडणुकीवरून भाजप आणि शिवसेना शिंदे गट आमने-सामने येण्याची शक्यता आहे.
