पुणे महापालिकेत सत्ता स्थानी असलेल्या पक्षाला सर्वच्या सर्व जागा निवडून देऊनही स्थानिक नागरिकांच्या समस्या जैसे थे च असून नागरी समस्यांकडे लक्ष वेधण्यासाठी कोथरूड परिसरामध्ये मात्र स्थानिक नागरिकांना कधी न्यायालयाचा तर कधी सिटीझन फोरमचा आधार घ्यावा लागत असून विरोधी हीन लोकप्रतिनिधित्वाची वाणवा सर्रासपणे जाणवत आहे. कोथरूड परिसरामध्ये व्यावसायिक फायद्यासाठी लोकप्रतिनिधींची चुप्पी स्थानिक नागरिकांना त्रासदायक वाटत असून या विरोधात नागरिकांच्या आवाज वाढू लागला आहे. काही दिवसापूर्वी सत्ताधारी पक्षाच्या वतीने व्यावसायिक हितार्थ याच रस्त्याच्या दिशेमध्ये केलेल्या बदलामुळे एक दिवसाचे लाक्षणिक उपोषण करण्यात आलं होते. त्यानंतर पुणे महापालिकेचा ताबा असलेली सुमारे एक एकर जागा खाजगी व्यावसायिकाला वापरण्यास देण्याची परवानगी सुद्धा याच सत्ताधारी लोकप्रतिनिधी मार्फत देण्यात आलेली आहे.
या भागातील व्यावसायिक हितार्थ घेतले जाणारे निर्णय सुरू असतानाच संबंधित कोथरूड विकास आराखड्यातील (डीपी) २० मीटर रुंदीच्या प्रस्तावित रस्त्यासाठी सुमारे ४८० हून अधिक वृक्षांची कत्तल करण्याचा घाट महापालिका प्रशासनाने घातला आहे. या वृक्षतोडीविरोधात कोथरूडमधील स्थानिक रहिवासी आणि पर्यावरणप्रेमी आक्रमक झाले असून, सिद्धार्थ टॉवर्स येथे एकत्र येत नागरिकांनी तीव्र निदर्शने केली. झाडे वाचवण्यासाठी आंदोलनाची व्याप्ती वाढवत प्रसंगी न्यायालयात दाद मागण्याचा इशारा या वेळी देण्यात आला.
मृत्युंजयेश्वर मंदिरामागील सर्व्हे क्रमांक १२/२ आणि १२/५ या सरकारी जागेतून हा रस्ता प्रस्तावित आहे. मागील आठवड्यात प्रशासनाने येथे झाडे तोडण्यास सुरुवात केली होती. नागरिकांच्या तीव्र विरोधामुळे हे काम तात्पुरते थांबवण्यात आले. याप्रकरणी महापालिकेला कायदेशीर नोटीस बजावली असून माहिती अधिकारांतर्गत माहितीही मागवण्यात आली आहे.
झाडे वाचवण्यासाठी कायदेशीर लढा
ही जागा सरकारी असून, येथे होणारा रस्ता खासगी व्यक्तीला २० वर्षांसाठी चालवायला दिला जाणार आहे. वृक्षतोड पूर्णपणे थांबवण्यासाठी धोरणात्मक व कायदेशीर व्यूहरचना आखून नागरिक पुढील दिशा ठरवणार आहेत. हा रस्ता ओढ्या-नाल्याच्या नैसर्गिक प्रवाहात अडथळा ठरत असून, त्यामुळे पावसाळ्यात पूरस्थिती गंभीर होण्याचा धोका नागरिकांनी व्यक्त केला. महापालिकेकडून पुनरोपण करण्यात आलेली झाडे प्रत्यक्षात जगत नाहीत, असा पूर्वानुभव लक्षात घेता मूळ झाडे वाचवणे आवश्यक असल्याचे स्पष्ट करण्यात आले.
झाडे वाचवण्यासाठी प्रयत्न करू – लोकप्रतिनिधी
स्थानिक नगरसेविका मंजुश्री खर्डेकर आणि मिताली सावळेकर यांनी आंदोलकांची भेट घेऊन भूमिका जाणून घेतली. पथ विभागाच्या अधिकाऱ्यांशी संपर्क साधला असता काम थांबवणे शक्य नसल्याचे सांगण्यात आले; मात्र रस्त्याची आखणी बदलून जास्तीत जास्त झाडे कशी वाचवता येतील, यावर लक्ष केंद्रित करण्याचे आश्वासन लोकप्रतिनिधींनी दिले.
समाज एकत्र आल्यासच दबाव : सारंग यादवाडकर
पुण्यात पर्यावरण रक्षणाचा मोठा प्रश्न निर्माण झाला असून शहराचा विध्वंस सुरू आहे. हा रस्ता नैसर्गिक ओढ्यावरून जात असल्याने याविरोधात न्यायालयात जाता येईल. समाजाने एकत्र येऊन भक्कम दबाव गट तयार केला, तरच प्रशासनाला जनभावनेची दखल घेऊन निर्णय बदलावा लागेल, असे पर्यावरण अभ्यासक सारंग यादवाडकर यांनी नमूद केले.
