पुण्याच्या गणेश विसर्जनाच्या वैभवशाली मिरवणुकीला यंदा विक्रमी वेळ लागला. मानाच्या पहिल्या पाच गणपतींनाच विसर्जनासाठी अर्ध्या तासाचा उशीर झाल्यानंतर गेल्या पाच वर्षांपासून ३० तासांहून अधिक कालावधी चाललेली मिरवणूक यंदाही ३३ तास ३३ मिनिटे चालली. गेल्या वर्षाच्या तुलनेत यंदा संपूर्ण मिरवणूक सुमारे सव्वातास लवकर संपली. मिरवणुकीत डीजेवरून रान पेटल्यानंतर आवाजाची पातळी कमी होऊन काहीसा परिणाम झाला. दरम्यान, घोरपडीतील बी. टी. कवडे रस्त्यावर एका मंडळाच्या ट्रॅक्टरच्या चाकाखाली आल्याने हलगीवादक तरुणाचा मृत्यू झाला.
ढोल-ताशांचा निनाद, हलगीचा कडकडाट, ‘गणपती बाप्पा मोरया’चा जयघोष आणि रस्त्यांच्या दुतर्फा उसळलेली भाविकांची गर्दी अशा जल्लोषपूर्ण वातावरणात विसर्जन मिरवणुकीला प्रारंभ झाला. मानाच्या पहिल्या कसबा गणपतीची आरती महापालिका आयुक्त नवल किशोर राम यांच्या हस्ते झाल्यानंतर सकाळी १० वाजता गणराय मार्गस्थ झाला. यावेळी उपमुख्यमंत्री सुनेत्रा पवार, केंद्रीय राज्यमंत्री मुरलीधर मोहोळ, उच्च व तंत्रशिक्षणमंत्री चंद्रकांत पाटील, राज्यमंत्री माधुरी मिसाळ, महापौर मंजूषा नागपुरे, आमदार डॉ. नीलम गोऱ्हे उपस्थित होते. मंडईतील लोकमान्य टिळक पुतळा परिसरातून निघालेल्या कसबा गणपतीला बेलबाग चौक गाठण्यासाठी सुमारे अर्धा तास लागला.
भगवे फेटे आणि पारंपरिक पोशाख परिधान केलेल्या तरुण-तरुणींची संख्या मिरवणुकीत लक्षणीय होती. ढोल-ताशा पथके, हलगी, झांज, लेझीम आणि शंखवादनाने मिरवणूक मार्ग दुमदुमला. महिला वादकांच्या तालबद्ध सादरीकरणालाही भाविकांनी उत्स्फूर्त दाद दिली. लक्ष्मी रस्ता, कुमठेकर रस्ता, केळकर रस्ता, बेलबाग आणि टिळक चौकात भाविकांची मोठी गर्दी झाली. इमारतींच्या गच्च्या आणि सज्जेही नागरिकांनी भरले होते.विविध मंडळांचे आकर्षक रथ, फुलांची सजावट आणि विद्युत रोषणाई भाविकांचे लक्ष वेधून घेत होती. पर्यावरण संवर्धन, व्यसनमुक्ती, पाणी बचत, सामाजिक सलोखा आणि नागरिकांच्या जबाबदारीचे संदेश देणाऱ्या देखाव्यांतून प्रबोधन करण्यात आले. पारंपरिक वादनाला मोठा प्रतिसाद मिळाला असला, तरी काही मंडळांच्या डीजेचा दणदणाटही कायम होता.
सकाळी ९ वाजून ५५ मिनिटांनी सुरू झालेल्या मानाच्या पाच गणपतींच्या मिरवणुकीची सुमारे सव्वा आठ तासांनी सांगता झाली. गतवर्षी हा टप्पा सात तास ४० मिनिटांत पूर्ण झाला होता. त्यामुळे यंदा मानाच्या गणपतींच्या विसर्जनाला जवळपास अर्धा तास अधिक लागला. मंडळांना रांगेत सोडण्यातील विस्कळीतपणा, वादनासाठी घेतलेला अधिक वेळ आणि वाढलेली गर्दी यामुळे मिरवणूक रेंगाळली. काही मंडळांना डावलल्याच्या तक्रारींमुळे वादाचे प्रसंगही घडले. पोलिसांचे गर्दीवरील नियंत्रण आणि मंडळांच्या क्रमाचे नियोजन अपुरे ठरल्याचा आरोप कार्यकर्त्यांनी केला.
यंदा ३३ तास ३३ मिनिटे
गतवर्षी संपूर्ण विसर्जन मिरवणूक ३४ तास ४४ मिनिटे चालली होती. सकाळी ९.३० वाजता सुरू झालेली मिरवणूक दुसऱ्या दिवशी रात्री ८.१५ वाजता संपली होती. मानाच्या गणपतींचे विसर्जन लवकर होऊनही वादकांची वाढलेली संख्या, डीजे, मंडळांचा वादनाचा आग्रह, गर्दी आणि विस्कळीत नियोजनामुळे सार्वजनिक मंडळांची मिरवणूक रेंगाळली होती. यंदाही मानाच्या गणपतींनाच गतवर्षीपेक्षा पाऊण तास अधिक लागल्याने मिरवणूक लांबेल असे वाटत असताना शेवटचा सार्वजनिक गणपती रात्री ७ वाजून ३३ मिनिटांनी विसर्जित झाला. मिरवणुकीला ३३ तास ३३ मिनिटे लागली. त्यामुळे गेल्या वर्षाच्या तुलनेत यंदा मिरवणूक सव्वातास लवकर संपली.
डीजेवरून रान
डीजेच्या आवाजावरून यंदा पुण्यात मोठे रान उठले. विद्यानंद बापट यांनी याबाबत उघड भूमिका घेतल्यानंतर सामान्य पुणेकरांनीही आंदोलन केले. त्यानंतर सक्त ताकीद दिल्यानंतर डीजेचा आवाज काहीसा कमी झाल्याचे पोलिसांचे म्हणणे आहे.
दरम्यान घोरपडीतील बी. टी. कवडे रस्त्यावर एका मंडळाच्या ट्रॅक्टरच्या चाकाखाली आल्याने हलगीवादक तरुणाचा मृत्यू झाला. जल्लोषाच्या वातावरणात घडलेल्या या दुर्घटनेमुळे हळहळ व्यक्त करण्यात आली.
शासकीय नोंदणी नुसार मागील पाच वर्षातील विसर्जन मिरवणुकीचा कालावधी खालील प्रमाणे
वर्ष — मिरवणुकीचा कालावधी
२०२२ – ३० तास
२०२३ – ३१ तास
२०२४ – ३० तास २७ मिनिटे
२०२५ – ३४ तास ४४ मिनिटे
२०२६ – ३३ तास ३३ मिनिटे
