शुक्रवारी दुष्काळासंदर्भात जीआर काढला जाणार आहे. मुख्यमंत्री देवेंद्र फडणवीस यांनी याबाबत माहिती दिली आहे. सध्या फडणवीस हे अमरावतीच्या दौऱ्यावर आहेत. अमरावती विमानतळावर माध्यमांशी संवाद साधताना त्यांनी याबाबत माहिती दिली आहे. पिकांची परिस्थिती अतिशय खराब आहे. विशेष: सोयाबीन असेल, काही भागातील कापूस असेल उडीद असेल, तूर असेल सगळ्या पिकांवर आपल्याला या ठिकाणी संकट पहायला मिळत आहे. म्हणूनच हा दौरा करून शेतकऱ्यांना कशा प्रकारे मदत करता येईल, हा आमचा प्रयत्न आहे.
उपसमितीत कोणत्या ९ मंत्र्यांचा समावेश?
दुष्काळ निवारणासाठी स्थापन करण्यात आलेल्या उपसमितीमध्ये महसूलमंत्र्यांसोबतच विविध ९ महत्त्वाच्या खात्यांच्या मंत्र्यांना सदस्य म्हणून जबाबदारी देण्यात आली आहे.
- गिरीश महाजन – जलसंपदा (विदर्भ, तापी व कोकण पाटबंधारे महामंडळ) व आपत्ती व्यवस्थापन मंत्री
- गुलाबराव पाटील – पाणी पुरवठा व स्वच्छता मंत्री
- संजय राठोड – मृद व जलसंधारण मंत्री
- पंकजा मुंडे – पशुसंवर्धन, पर्यावरण व वातावरणीय बदल मंत्री
- दत्तात्रय भरणे – कृषी मंत्री
- जयकुमार गोरे – ग्राम विकास मंत्री
- प्रताप सरनाईक – परिवहन मंत्री
- मकरंद पाटील – मदत व पुनर्वसन मंत्री
- बाबासाहेब पाटील – सहकार मंत्री
उपसमिती नेमकं काय काम करणार?
दर आठवड्याला आढावा बैठक : प्रत्यक्ष बांधावर जाऊन परिस्थितीची पाहणी करणे आणि दर आठवड्याला बैठक घेऊन दुष्काळाचा संपूर्ण अहवाल मुख्यमंत्री व दोन्ही उपमुख्यमंत्र्यांना सादर करणे.
पिकांच्या नुकसानीचे पंचनामे : शेतातील पिकांच्या नुकसानीच्या पंचनाम्यांचा आढावा घेऊन शेतकऱ्यांना मिळणाऱ्या मदतीबाबत शिफारसी करणे.
पाण्याचे नियोजन : प्रत्येक जिल्ह्यातील उपलब्ध पाण्याचा साठा विचारात घेऊन पिण्याच्या पाण्याचे योग्य नियोजन करणे.
जनावरांच्या चाऱ्याची सोय : जिल्ह्यातील जनावरांची संख्या लक्षात घेऊन चाऱ्याची कमतरता भासू नये म्हणून योग्य त्या उपाययोजना करणे.
तातडीचे निर्णय : परिस्थितीनुसार तातडीने घ्यावयाच्या महत्त्वाच्या निर्णयांबाबत राज्य मंत्रिमंडळाला शिफारस करणे. या सर्व बैठकांचे नियोजन आणि समन्वयाचे काम मदत व पुनर्वसन विभागामार्फत केले जाईल.
आपली दुष्काळाची जी संहिता आहे, त्या संहितानुसार ट्रिगर वन प्रमाणे दुष्काळ जाहीर करण्याचा जो काही शासन आदेश आहे, तो आदेश आम्ही काढणार आहोत, असं यावेळी देवेंद्र फडणवीस यांनी म्हटलं आहे. कदाचित त्यामध्ये एखादा दुष्काळी भाग सुटला तर ट्रिगर थ्री प्रमाणे आम्ही त्या भागाचा समावेश करू, पण सकृतदर्शनी राज्यात मोठ्या प्रमाणात दुष्काळ दिसून येत आहे, असा सर्व भाग जिथे दुष्काळ दिसत आहे, त्या सर्व भागाचा समावेश आम्ही यामध्ये करणार आहोत.
शेतकऱ्यांना आपल्याला वेगवेगळी मदत करावी लागणार आहे. विशेष: चाऱ्याची टंचाई, पाण्याची टंचाई या संदर्भांत आपण कार्यवाही करणार आहोत, असंही यावेळी फडणवीस यांनी म्हटलं आहे.
