पुणे शहरात गेल्या सहा दिवसांत ५३ हजार ८५२ गणेश मूर्तींचे विसर्जन झाले असून, ६८ हजार ६३३ किलो निर्माल्य संकलित करण्यात आले आहे. महापालिकेने गणेश विसर्जनासाठी नदीच्या घाटांसह शहराच्या सर्वच भागात सोसायट्या, सार्वजनिक जागा याठिकाणी विसर्जनाची सुविधा केली आहे.बांधलेल्या हौदासह, पाण्याच्या टाक्यांची व्यवस्था ठिकठिकाणी केली आहे. तर मूर्ती संकलनासाठीही स्टॉल लावल्याने त्यासही नागरिकांचा प्रतिसाद आहे.
१४ सप्टेंबर ते १९ सप्टेंबर या कालावधीत बांधलेल्या हौदांमध्ये ८ हजार ४०२ गणेश मूर्तींचे विसर्जन झाले आहे. लोखंडी टाक्यांमध्ये ३४ हजार ११९ मूर्ती विसर्जित झाल्या.तर ११ हजार ३३१ मूर्तींचे संकलन करण्यात आले आहे. थोडक्यात लोखंडी टाक्यांमध्ये विसर्जन करणाऱ्यांची संख्या जास्त आहे. याच कालावधीत ६८ हजार ६३३ किलो निर्माल्य जमा झाले आहे. हे निर्माल्य खत तयार करण्यासाठी वापरले जाणार आहे.
पाचव्या दिवशी शहरात अनेक ठिकाणी विसर्जन झाले. तर सहाव्या दिवशी गौरी विसर्जनासह गणपतीचे विसर्जन झाले. पाचव्या दिवशी शहरात २० हजार २८९ मूर्ती विसर्जित झाल्या. तर आज (ता. १९) सहाव्या दिवशी सायंकाळी सहापर्यंत १२ हजार ५१५ मूर्तींचे विसर्जन झाल्याची माहिती घनकचरा व्यवस्थापन विभागाने दिली आहे.
