गेल्या काही दिवसांपासून पुण्यात गणेशोत्सवाच्या काळात होणाऱ्या ध्वनीप्रदूषणाबाबत सडेतोड, सुस्पष्ट आणि बिनतोड तार्किक पद्धतीने मांडणी करणारे विद्यानंद बापट हे सोशल मीडियावर चर्चेचा विषय झाले आहेत.विद्यानंद बापट यांनी गणेशोत्सवातील ध्वनीप्रदूषणाबाबत घेतलेल्या भूमिकेमुळे महाराष्ट्रातील राजकीय, सामाजिक आणि धार्मिक अवकाश ढवळून निघाला आहे. अशातच आता पुणेकरांच्या कल्पनशक्तीला धुमारे दर्शविणारा एक व्हिडीओ समोर आला आहे. हा व्हिडीओ पाहून तुम्हाला देखील हसू आवरणार नाही.
ज्यांचा विरोध त्यांनाच DJ वर नाचवलं
आज संपूर्ण भारतवर्षात दहीहंडी उत्सव साजरा केला जातोय. पुण्यात याची खास लौकिक परंपरा आहे. अनेक मंडळं यासाठी डीजे लावून दहीहंडीचा आनंदोत्सव साजरा करतात. अशातच आता डीजेला विरोध करणाऱ्या विद्यानंद बापटांनाच डीजेवर नाचवल्याचा व्हिडीओ समोर आला आहे. डीजेच्या एलईडी लाईटवर विद्यानंद बापट यांचा एआय व्हिडीओ झळकला. त्यावर बापट यांनाच नाचवताना पहायला मिळालं आहे. त्यामुळे नाद करा पण पुणेकरांचा कुठं! अशी चर्चा सोशल मीडियावर होताना दिसत आहे.
अवधुत गुप्तेंचं बापट यांच्यावर गाणं
विद्यानंद बापट यांच्या भूमिकेनंतर समाजातील अनेक लोकांकडून पाठिंबा मिळत आहे. यात संगीतकार आणि गायक अवधुत गुप्ते यांनी देखील अनोख्या पद्धतीनं विद्यानंद बापट यांना पाठिंबा दिला. अवधुत गुप्ते यांनी विद्यानंद बापट यांच्यावर थेट गाणं काढलं. ‘तुझ्या सारख्या सरळ माणसाचा ना हा धंदा, विद्यानंदा ओळख इथल्या आनंदी आनंदा’, अशा या गाण्याच्या बोली आहेत. त्याचा व्हिडीओ देखील तुफान व्हायरल होतोय.
विद्यानंद बापट यांना पोलीस संरक्षण
दरम्यान, विद्यानंद बापट यांना झालेल्या मारहाणीची गृह मंत्रालयाकडून गंभीर दखल घेण्यात आली होती. मुख्यमंत्री देवेंद्र फडणवीस यांच्या आदेशानुसार बापट यांना पोलिस संरक्षण देण्यात आलं होतं. यापुढे विद्यानंद बापट यांच्यासोबत पोलीस संरक्षण असणार आहे. सभागृह नेते गणेश बिडकर यांनी याविषयी माहिती दिली. तसेच आरोपीला एका दिवसाची पोलीस कोठडी सुनावली होती, जी आज पूर्ण होत आहे.
