मद्यविक्री परवाना मिळवून देण्यासाठी व्यावसायिकाकडे तब्बल २२ लाख रुपयांची लाच मागणाऱ्या राज्य उत्पादन शुल्क विभागातील (स्टेट एक्साईज) निरीक्षकाला लाचलुचपत प्रतिबंधक विभागाने (एसीबी) बेड्या ठोकल्या. येरवडा परिसरात सोमवारी दुपारी ही कारवाई करण्यात आली.
जितेंद्र हरिश्चंद्र पाटील (वय ४७, रा. सारथी शिवाली सोसायटी, कर्वे रस्ता, मूळ रा. गजानननगर, परभणी) असे संबंधित अधिकाऱ्याचे नाव आहे. याप्रकरणी एका व्यावसायिकाने ‘एसीबी’कडे तक्रार दाखल केली होती. त्यांनी दिलेल्या माहितीनुसार, पाटील हे उत्पादन शुल्क विभागाच्या येरवडा विभागात निरीक्षक आहेत.तर, तक्रारदार व्यावसायिक हे उत्पादन शुल्क विभागाकडून देण्यात येणाऱ्या परवान्याबाबतची कामे करतात. तक्रारदाराने मद्यविक्री परवान्याबाबत (एफएल- ३) एका फर्मकडून अर्ज सादर केला होता. संबंधित अर्ज मंजुरीसाठी वरिष्ठ अधिकाऱ्यांकडे पाठवितो, असे सांगून पाटील यांनी तक्रारदाराकडे २२ लाख रुपयांची मागणी केली होती.
तडजोडीअंती पाटील यांनी ११ लाख रुपयांची लाच मागितली.त्यानंतर व्यावसायिकाने ‘एसीबी’कडे तक्रार दाखल केली. संबंधित तक्रारीची पडताळणी झाल्यानंतर सोमवारी पाटील यांच्याविरुद्ध येरवडा पोलिस ठाण्यात गुन्हा दाखल करण्यात आला. पोलिस अधीक्षक शिरीष सरदेशपांडे, अतिरिक्त अधीक्षक अजित पाटील यांच्या मार्गदर्शनाखाली कारवाई करण्यात आली.
