पुणे : वातावरणातील घडामोडींमुळे शहरात मंगळवारी झालेल्या पावसाने दहा वर्षांपूर्वीचा विक्रम मोडला. पुण्यात १ मे ते २१ मे दरम्यान ११० मिलिमीटर पावसाची नोंद झाली. यापूर्वी मे २०१५ मध्ये १०६ मिमी पाऊस नोंदवला गेला होता. पुण्यात या महिन्यात सरासरी ३१.४ मिमी पाऊस पडतो. आठवडाभर पडलेल्या आणि मंगळवारी मुसळधार कोसळलेल्या पावसाने शंभरी ओलांडली. शिवाजीनगरमध्ये मे महिन्यात २४ तासांत ४०.५ मिमी पाऊस हादेखील एक उच्चांक ठरला. चिंचवडमध्ये एका रात्रीत १०१ मिमी पावसाची नोंद झाली असताना बुधवारी एनडीए परिसरात पावसाने शंभरी ओलांडली. पुढील काही दिवस पाऊस सक्रिय राहणार असल्याने महिनाभरातील आकडे अजून वाढणार आहेत.
कर्नाटक किनारपट्टीच्या बाजूला अरबी समुद्रात सध्या कमी दाबाचे क्षेत्र तयार होत आहे. त्यामुळे हवेतील बाष्पाचे प्रमाण वाढले आहे. हे बाष्प जमिनीच्या दिशेने येते आहे. या घडामोडींच्या प्रभावामुळे मध्य महाराष्ट्रासह कोकणात सर्वदूर गडगडाट आणि वादळीवाऱ्यांसह सध्या पाऊस पडत आहे. पुण्यातही मंगळवारी या कारणांमुळे पावसाने जोरदार हजेरी लावली.
बुधवारी दुपारपर्यंत मात्र पावसाची उघडीप होती. दुपारनंतर ऊन आणि उकाडा वाढला होता. संध्याकाळपर्यंत सरी बरसल्या नाहीत; त्यामुळे आज पावसाने विश्रांती घेतल्याची नागरिकांमध्ये चर्चा सुरू असतानाच, रात्री आठनंतर पावसाला सुरुवात झाली. बावधन, बाणेर, कोथरूड, सिंहगड रस्ता, कात्रज, आंबेगाव, सहकारनगर भागांत सुरू झालेला पाऊस थोड्याच वेळात संपूर्ण शहरात बरसला. जिल्ह्यातही जोरदार सरी बरसल्या. पावसाला जोर असल्याने सलग दुसऱ्या दिवशी काही भागांत रस्त्यांवर पावसाचे पाणी साठले होते. काही भागांत हलक्या, तर काही ठिकाणी मध्यम स्वरूपाच्या पावसाची नोंद झाली. नरवीर तानाजी मालुसरे रस्त्यावर मुसळधार पाऊस सुरू होता. रात्री उशिरापर्यंत ढगांचा गडगडाट आणि विजांच्या कडकडाटासह पाऊस सुरू होता.
अनुकूल वातावरणामुळे पुढील चार दिवस पावसाचा मुक्काम कायम राहणार आहे. आज, गुरुवारी दिवसभर आकाश ढगाळ राहणार असून, वादळी वारे आणि विजांच्या कडकडाटासह मध्यम ते जोरदार स्वरूपाच्या पावसाची शक्यता असल्याचा इशारा भारतीय हवामानशास्त्र विभागाने दिला आहे.
