बैलगाडा घाटामध्ये तुफान राडा झाला असून हाणामारीमध्ये एक तरुण गंभीर जखमी झाला आहे. पुणे जिल्ह्यातल्या शिरूरमध्ये बैलगाडी शर्यतीदरम्यान ही धक्कादायक घटना घडली आहे. कौटुंबीक वादातून हा सर्व प्रकार घडला असल्याची माहिती समोर आली आहे. या घटनेचा धक्कादायक व्हिडीओ सोशल मीडियावर व्हायरल होत आहे. मिळालेल्या माहितीनुसार, पुण्यातल्या शिरूर तालुक्यातील मलठण येथील शिंदेवाडीमध्ये आज यात्रा आहे. यात्रेनिमित्ताने गावामध्ये बैलगाडा शर्यतीचे आयोजन करण्यात आले आहे. या शर्यतीमध्येच दोन गटामध्ये तुफान हाणामारी झाली. दोन कुटुंबातील हा वाद आहे. बैलगाडा शर्यतीदरम्यान दोन्ही कुटुंबातील काही सदस्य आमने-सामने आले. एका तरुणाने दुसऱ्या तरुणाला काठीने बेदम मारहाण केली. मारहाणीमध्ये तरुण गंभीर जखमी झाला आहे. जखमी तरुणाला तात्काळ नजीकच्या खासगी रुग्णालयामध्ये दाखल करण्यात आले आहे. या तरुणाची प्रकृती चिंताजनक आहे. हाणामारी करणारी ही दोन्ही कुटुंब शिंदेवाडी येथीलच आहेत. या दोन्ही कुटुंबातील भांडणाचे कारण अद्याप समोर आले नाही.
ही घटना घडली त्यावेळी संपूर्ण गाव बैलगाडा शर्यत पाहण्यासाठी आले होते. त्याच ठिकाणी ही हाणामारी सुरू असताना देखील एकही व्यक्ती त्यांच्यातील वाद सोडवण्यासाठी आला नाही. एका तरुणाला काठीने जीव जाईपर्यंत दुसरा तरुण मारत असताना देखील घटनास्थळी सर्वजण बघ्याच्या भूमिकेत होते. अनेक जण मोबाईलमध्ये ही घटना कैद करण्यामध्ये व्यस्त होते.
