राज्य मंडळाच्या दहावीच्या निकालात तब्बल २११ विद्यार्थ्यांना पैकीच्या पैकी म्हणजेच १०० टक्के गुण मिळाले आहेत. गेल्या वर्षीच्या तुलनेत शंभर टक्के गुण मिळविणाऱ्या विद्यार्थ्यांची संख्या यंदा वाढली आहे. यंदा शंभर टक्के गुण मिळविणारे ११३ असे सर्वाधिक विद्यार्थी लातूर विभागात आहेत. तर राज्यातील ८१ हजार ८०९ विद्यार्थ्यांना ९० टक्क्यांपेक्षा अधिक गुण मिळाले आहेत.

गेल्या वर्षी दहावीच्या परीक्षेत जवळपास १८७ विद्यार्थ्यांना १०० टक्के गुण मिळाले होते, त्यात लातूर विभागातील १२३ विद्यार्थ्यांना १०० टक्के गुण मिळाले होते.

यंदा राज्य मंडळाने दिलेल्या माहितीनुसार, पुणे-१३, नागपूर- ०३, छत्रपती संभाजीनगर-४०, मुंबई- ०८, कोल्हापूर-१२, अमरावती-११, नाशिक- ०२, लातूर-११३ आणि कोकण- ०९ विद्यार्थ्यांना विभागीय मंडळात १०० टक्के गुण मिळाले आहेत.

तब्बल २८५ विद्यार्थ्यांना ३५ टक्के

३५ टक्के गुण मिळविणारे विभागनिहाय विद्यार्थी :

पुणे-५९, नागपूर- ६३, छत्रपती संभाजीनगर- २८, मुंबई-६७,

कोल्हापूर-१३, अमरावती-२८, नाशिक-०९, लातूर- १८, कोकण-००

फक्त एक तासाच्या पावसानंतर पुण्यातील बहुतांश भागात पाणी साचलं आहे. तासाभराच्या पावसाने जर पुणे जलमय होत असेल तर पुन्हा महापालिकेच्या कामावर संताप व्यक्त केला जात आहे. सोमवारी सायंकाळी आणि मंगळवारी दुपारी झालेल्या पावसानं शहराती अनेक रस्त्यांवर पाणी साचलं. कोथरूड, सिंहगड रस्ता, बाणेर-बालेवाडी, नऱ्हे या भागात सध्या जोरदार पाऊस पडत आहे. यामुळे रस्त्यांवर पाणीच पाणी झाले असून वाहनचालकांना मोठ्या त्रासाला सामोरे जावे लागत आहे.

पावसामुळे शहरात वाहतुकीची मोठी कोंडीची स्थिती निर्माण झाली आहे. दुपारी सुरू असलेल्या पावसाने पाणी साचल्यानंतर वाहतूक मंदावली आहे. दुपारी १ ते ४ वाजण्याच्या सुमारास मुसळधार पावसाचा इशारा हवामान विभागाने दिला आहे. जर सध्या सुरू असलेला पाऊस असाच पडत राहिला तर सायंकाळी ऑफिस सुटण्याच्या वेळेत वाहतुकीची कोंडी आणखी वाढ झाली आहे. यामुळे पुणेकरांना वाहतूक कोंडीचा त्रास सहन करावा लागला.

यंदाही पावसाळ्याआधी ड्रेनेज व गटारी स्वच्छता, खड्डे बुजविण्याची कामे महापालिकेनं पूर्ण केली नसल्याचं दिसून येतंय. यामुळे पहिल्या पावसातच शहरातील अनेक रस्त्यांवर पाणी साचलंय. शहरात विविध ठिकाणी सुरू असलेली मेट्रोची कामे, रस्त्यांची कामे यामुळे आधीच रस्ते अरुंद झाले आहेत. त्यातच अपूर्ण काम आणि उघड्या गटारांमुळे पावसाचे पाणी साचल्याने नागरिकांचे हाल होत आहेत.

गेल्या दोन दिवसांपासून पुण्यात ढगाळ हवामान आहे. सोमवारीही संध्याकाळी पुण्यात पावसाने हजेरी लावली होती. मंगळवारी पुणे शहरातील विविध भागांमध्ये मुसळधार पाऊस पडण्याची शक्यता वर्तवण्यात आली आहे.

पंतप्रधान नरेंद्र मोदी यांनी मंगळवारी पंजाबमधील आदमपूर एअरबेसवरून दहशतवादाच्या मुद्द्यावर पाकिस्तानला चोख प्रत्युत्तर दिलं. मोदींनी स्पष्टपणे सांगितलं की ऑपरेशन सिंदूर फक्त स्थगित करण्यात आलं आहे. भारताने केवळ दहशतवाद्यांनाच नव्हे तर त्यांना पाठिंबा देणाऱ्या पाकिस्तानी सैन्यालाही जोरदार प्रत्युत्तर देऊन आपली ताकद दाखवून दिली आहे. नरेंद्र मोदी यांच्या या विधानानंतर पाकिस्तान घाबरला आहे. पाकिस्तानचे संरक्षण मंत्री ख्वाजा आसिफ यांची प्रतिक्रिया समोर आली आहे.

जिओ टीव्हीला दिलेल्या मुलाखतीत ख्वाजा आसिफ म्हणाले की, “पाकिस्तानने दहशतवादासोबतचे सर्व संबंध तोडले आहेत. जगातील देशांनी पाकिस्तानात येऊन तपास करावा की येथे दहशतवादी कँप आहेत की नाही. आम्ही काही वर्षांपूर्वीच दहशतवादासोबतचे सर्व संबंध तोडले आहेत.” पंजाबमधील आदमपूर एअरबेसवर भारतीय हवाई दलाच्या योद्ध्यांना मोदींनी संबोधित केलं.

“ज्या पाकिस्तानी सैन्यावर हे दहशतवादी अवलंबून होते त्यांना भारतीय लष्कर, भारतीय हवाई दल आणि भारतीयांनी पराभूत केलं आहे. भारतीय सैन्याने पाकिस्तानी सैन्याला हे देखील दाखवून दिलं की पाकिस्तानमध्ये अशी कोणतीही जागा शिल्लक नाही जिथे दहशतवादी आरामात श्वास घेऊ शकतील. आम्ही घरात घुसून मारू आणि तुम्हाला पळून जाण्याची एकही संधी देणार नाही” असं पंतप्रधानांनी म्हटलं आहे. भारताच्या आधुनिक लष्करी क्षमतेचं कौतुक करून पाकिस्तानला थेट इशारा दिला.

“आम्ही घरात घुसून मारू, पळून जाण्याची संधीही देणार नाही”; मोदींचा पाकिस्तानला सज्जड दम

“आपले ड्रोन, आपली क्षेपणास्त्र … त्यांच्याबद्दल फक्त विचार केल्याने पाकिस्तानची अनेक दिवसांची झोप उडून जाईल. भारत ही बुद्धांची भूमी आहे आणि गुरू गोविंद सिंहजी यांचीही भूमी आहे. गुरू गोविंद सिंहजी यांनी म्हटलं होतं की, ‘सवा लाख से एक लड़ाऊं, चिड़ियन ते मैं बाज तुड़ाऊं, तबै गुरु गोबिंद सिंह नाम कहाऊं’ वाईटाचा नाश करण्यासाठी आणि आपल्या धर्माच्या रक्षणासाठी शस्त्र उचलणं ही आपली परंपरा आहे. म्हणूनच जेव्हा आमच्या बहिणी आणि मुलींचं सिंदूर हिसकावून घेतलं गेलं, तेव्हा आम्ही दहशतवाद्यांच्या घरात घुसून त्यांना चोख उत्तर दिलं.”

सुरक्षा दलांनी जम्मू-काश्मीरमधील शोपियान जिल्ह्यात तीन दहशतवाद्यांचा खात्मा करण्यात आला आहे. या दहशतवाद्यांमध्ये पहलगाम हल्ल्यातील दहशतवादी शाहिद अहमद कुट्टे चा देखील समावेश आहे. पहलगाम दहशतवादी हल्ल्यातही त्याचे नाव पुढे आले होते आणि शोपियानमधील छोटीपोरा येथील त्याचे घरही सुरक्षा दलांनी जमीनदोस्त केले

कुट्टे हा लष्कर-ए-तैयबाच्या प्रॉक्सी ग्रुप टीआरएफचा एक मोठा कमांडर होता. मिळालेल्या माहितीनुसार, शाहिद गेल्या तीन ते चार वर्षांपासून अनेक दहशतवादी कारवायांमध्ये सहभागी होता. पहलगाम दहशतवादी हल्ला घडवून आणण्यात त्याची मोठी भूमिका होती.

जम्मू आणि काश्मीरमध्ये दहशतवाद्यांशी मंगळवारी सकाळी कुलगाम जिल्ह्यात चकमक सुरू झाली, त्यानंतर दहशतवादी शोपियानला पळून गेले. पण सुरक्षा दलांनी त्यांचा पाठलाग केला आणि शोपियान येथे पोहोचले आणि तेथे दहशतवाद्यांना घेरले. यादरम्यान, स्वतःला वेढलेले पाहून दहशतवाद्यांनी गोळीबार सुरू केला, ज्याला प्रत्युत्तर म्हणून सुरक्षा दलांनी तिन्ही दहशतवाद्यांना ठार केले.

कुट्टे कोण होता?

शोपियान आणि आसपासच्या भागात झालेल्या अनेक दहशतवादी घटनांमध्ये कुट्टेचा सहभाग असल्याचे मानले जाते. तो लष्कर-ए-तैयबासाठी भरती, प्रशिक्षण आणि ऑपरेशन्सचे समन्वय साधण्यात सक्रिय होता. भारतीय सुरक्षा एजन्सींच्या मते, तो अनेक तरुणांना दहशतवादी कारवायांमध्ये भरती करण्यातही सहभागी होता.

गेल्या काही वर्षांपासून रखडलेल्या तर भारत-पाकिस्तान युद्धजन्य परिस्थिती पुढे ढकलेल्या जिल्हाध्यक्ष निवडी आज (ता. 13) जाहीर झाल्या. दरम्यान सांगली जिल्ह्यातील शहर आणि ग्रामीण अध्यक्ष पदासाठीही नियुक्त्या झाल्या असून संग्राम महाडिक (ग्रामीण) आणि प्रकाश ढंग यांची शरहाच्या अध्यक्षपदी नियुक्ती करण्यात आली आहे. यामुळे तगड्या नेत्यांनी फिल्डिंग लावली असतानाही चंद्रकांत पाटलांनी आपली ताकद वाळव्यासह प्रकाश ढंग यांच्या मागे उभारल्याची चर्चा सध्या जिल्ह्यात सुरू झाली आहे.

सांगली जिल्ह्यात याच महिन्यात भाजप जिल्हाध्यक्ष निवड प्रक्रिया झाली होती. यावेळी जिल्हा परिषदेचे माजी अध्यक्ष संग्रामसिंह देशमुख व माजी आमदार पृथ्वीराज देशमुख यांनी आग्रह धरला होता. तर दोन चुलत भाऊच या पदावरून एकमेकांच्या समोर उभे झाल्याने दोन गटात खुर्चीसाठी वाद निर्माण होण्याची शक्यता निर्माण झाली होती.

दरम्यान लोकसभेनंतर या दोघा भावात अबोला निर्माण झाला होता. त्यातच भाजपचे जिल्हाध्यक्ष निशिकांत पाटील यांनी विधानसभेच्या तोंडावर उमेदवारीसाठी राष्ट्रवादीत प्रवेश केल्याने जिल्हाध्यक्ष पद रिक्त झाले होते. त्यावेळीही संग्रामसिंह देशमुख यांना संधी मिळेल अशा चर्चा सुरू झाल्या होत्या. मात्र त्यांच्या ऐवजी पक्षाचे जेष्ठ नेते दीपक शिंदे यांना संधी देण्यात आली होती.

यानंतर आता जिल्हाअध्यक्ष निवडीचा कार्यक्रम जाहीर होताच संग्रामसिंह देशमुख व पृथ्वीराज देशमुख यांनी जोरदार फिल्डींग लावली. कोअर कमिटीतील 42 जणांचे मतदान लिफाफ्यात बंद झाल्यानंतर कोणाची नियुक्ती होणार याकडे लक्ष लागले होते. तर आता नियुक्त्या जाहीर झाला असून संग्राम महाडिक यांनी बाजी मारलीय.

शहर जिल्हाध्यपदाच्याही शर्यतीत पक्षातील अनेक मात्तबार मैदान उतरले होते. पण संधी मिळाली ती चंद्रकांत पाटील यांचे निकटवर्तीय मानले जाणारे प्रकाश ढंग यांना. प्रकाश ढंग हे मागील दीड वर्ष शहराचे अध्यक्ष म्हणून पाहत होते. त्यांच्यात काळात लोकसभा आणि विधानसभा निवडणुका पार पडल्या. लोकसभेला महायुतीला संधी मिळाली नाही. पण विधानसभेला ढंग यांनी सुरेश खाडे आणि सुधीर गाडगीळ यांच्या मागे शहरात चांगली रसद उभी केली. यामुळे यांच्या विजय सुकर झाला. यामुळे त्यांच्या निवडीमागे या दोघांचा हात असू शकतो असेही शक्यता आता वर्तवली जातेय.

तसेच ढंग हे स्वत: मागील पाच वर्षे नगरसेवक म्हणून काम केलं असून त्यांनी सगळ्यांना सोबत घेवून काम केलं आहे. यामुळे महानगरपालिकेत भाजपमध्ये अंतर्गत वाद निर्माण झाले नाहीत. तर सदस्य नोंदणी कार्यक्रमातही जिल्ह्यात शहर आघाडीवर होते. यामुळे त्यांच्या निवडणीने आगामी स्थानिकमध्ये भाजपला मोठा फायदा मिळू शकतो.

अंतर्गत वाद नको

एकीकडे दोन दिग्गज नेते ग्रामीणसाठी इच्छुक असताना भाजपने सम्राट महाडिक यांच्या नावावर शिकामोर्तब केला आहे. यामुळे आगामी स्थानिकसाठी भाजपने मोठी रणनीती आखली असून अंतर्गत वाद टाळण्यासाठी संग्रामसिंह देशमुख व पृथ्वीराज देशमुख ही जबाबदारी दिलेली नाही. या दोघांपैकी एकाकडे जरी जिल्हाध्यक्ष पद दिले असते तर एक गट नाराज झाला असता. ही नाराजी टाळण्यासाठीच चंद्रकात पाटील यांच्याशी बोलून चंद्रशेखर बावनकुळे यांनी मधला मार्ग काढला असावा.

निशिकांत पाटलांसह जयंत पाटलांना शह

विधानसभेपूर्वी भाजपबरोबर असणारे निशिकांत पाटील उमेदवारीसाठी राष्ट्रवादी काँग्रेस सोबत गेले. कदाचित हेच भाजपला पटले नसल्याने पुन्हा एकदा वाळवा तालुक्यातच जिल्हा अध्यक्षपद देण्यात आले आहे. निशिकांत पाटलांचे वाढणारे राजकीय वजन कमी करण्यासह आगामी जिल्हा परिषदे वेळी जयंत पाटलांना शह देण्यासाठी महाडिक यांना पुढे आणले जात आहे. शिराळा आणि वाळवा तालुक्यात राहुल महाडिक आणि सम्राट महाडिक यांचा गट सक्रीय आहे. याला ताकद देण्याचे काम चंद्रकांत पाटील करत आहेत. ज्याचा फायदा आगामी स्थानिकमध्ये मिळू शकतो.

कामगार विश्वात प्रतिष्ठेच्या असलेल्या कामगार भूषण पुरस्कार आणि विश्वकर्मा गुणवंत कामगार पुरस्कारांचे मंगळवार, दि. १३ मे रोजी वितरण करण्यात आले. राज्यपाल सी.पी.राधाकृष्णन यांच्या हस्ते  रविंद्र किसनराव रायकर (कमिन्स इंडिया लिमिटेड, कोथरूड पुणे)यांना विश्वकर्मा गुणवंत कामगार पुरस्कार प्रदान करण्यात आला.

यावेळी कामगार मंत्री अॅड.आकाश फुंडकर, कामगार राज्यमंत्री  अॅड.आशिष जयस्वाल, आमदार मनिषा कायंदे मनोज जामसुदकर सर्व स्थानिक खासदार व आमदार, तसेच कामगार विभागाच्या प्रधान सचिव आय.ए.कुंदन, कामगार आयुक्त डॉ.एच.पी.तुम्मोड, कामगार कल्याण आयुक्त रविराज इळवे आदी मान्यवरांच्या उपस्थितीत हा सोहळा पार पडला.

महाराष्ट्र कामगार कल्याण मंडळाचेवतीने रुपये  रुपये २५ हजार, स्मृतीचिन्ह आणि मानपत्र असे पुरस्काराचे स्वरूप होते.

नोकरी करत असतानाच विविध सामाजिक, सांस्कृतिक, साहित्यिक,शैक्षणिक, क्रीडा, संघटन आदी क्षेत्रात उल्लेखनीय काम केल्याबद्दल राज्य शासनाच्या महाराष्ट्र कामगार कल्याण मंडळाकडून रविंद्र किसनराव रायकर यांना विश्वकर्मा गुणवंत कामगार पुरस्कार देऊन गौरवण्यात आले.

 सदर पुरस्कार हा समाजाला अर्पण करण्याची भावना रविंद्र रायकर यांनी व्यक्त केली. यासाठी कामगार भूषण राजेंद्र वाघ, पुरुषोत्तम सदाफुले यांचे मार्गदर्शन  लाभले. किर्लोस्कर कमिन्स एम्प्लॉईज युनियनचे अध्यक्ष महेंद्र बालवडकर आणि पदाधिकारी  तसेच कमिन्स परिवारातील अधिकारी वर्ग व समाज बांधव हनुमंतराव पांचाळ, गणपतराव गायकवाड, धनराज माने आणि पत्नी निकिता यांनी मोलाची मदत केली असून समाजातून रविंद्र रायकर यांचे विशेष अभिनंदन करण्यात येत आहे.